Náms- og starfsráðgjafi

Forsíða / Þjónusta / Nemendaþjónusta FNV / Námsráðgjafi

Allir nemendur Fjölbrautaskóla Norðurlands vestra hafa aðgang að þjónustu náms- og starfsráðgjafa. Náms- og starfsráðgjafi er með skrifstofu í bóknámshúsi skólans.

Náms- og starfsráðgjafi FNV er:

Þorbjörg Sandra Magnúsdóttir, netfang: sandra@fnv.is

Nemendur geta pantað viðtal hjá náms- og starfsráðgjafa með því að panta tíma í gegnum Innu, hafa samband við skrifstofu skólans eða haft beint samband við náms- og starfsráðgjafa.

Starfssvið náms- og starfsráðgjafa

Náms- og starfsráðgjafi stendur vörð um velferð nemenda, styður þá og liðsinnir í þeim málum er varða nám þeirra og skólavist. Námsráðgjöf er persónuleg leiðsögn við nemendur og fer fram í trúnaði. Nemendur geta leitað til náms- og starfsráðgjafa af margvíslegum ástæðum og einnig geta kennarar vísað nemendum til náms- og starfsráðgjafa.

Námstækni og skipulagning tíma

Tímaáætlanir, gott skipulag, markviss vinnubrögð og góð ástundun eru lykilþættir sem stuðla að góðum námsárangri. Í framhaldsskóla ber nemandinn sjálfur ábyrgð á gerð námsáætlunar með aðstoð deildarstjóra og/eða náms- og starfsráðgjafa. Gott er að gera tímaáætlun og skipuleggja tímann sinn frá degi til dags og gera þannig ráð fyrir tíma til að stunda heimanám, samvera með fjölskyldu og vinum, íþróttir, vinna o.s.frv.

Vikuáætlun (Skjal)

Skipulags- og verkefnatafla (Skjal)

Náms- og starfsráðgjafi aðstoðar nemendur við að skipuleggja og halda utan um nám sitt.

Nemendur með sértæka námsörðugleika

Nemendur sem hafa fengið greiningu um námsörðugleika hjá sérkennara, sálfræðingi eða lækni þegar þeir hefja nám við skólann er bent á að koma í viðtal hjá náms- og starfsráðgjafa sem fyrst. Nemendur sem glíma við einhverskonar námsörðugleika geta sótt um ýmis úrræði í prófum. Þar má til dæmis nefna lengdan próftíma, sérstofu, nemendur geta óskað eftir því að fá prófin sín lesin upp, lituð prófblöð og fleira.

Veikindi

Nemendur sem glíma við langtímaveikindi sem hamla þeim við nám og/eða mætingar hafa samband við náms- og starfsráðgjafa. Náms- og starfsráðgjafi metur með hvaða móti skólinn getur komið til móts við nemendur svo að viðkomandi nemandi geti stundað námið og falli ekki á mætingu sökum veikinda.

Persónulegir erfiðleikar

Erfiðar aðstæður nemenda, skilnaður foreldra, vandamál í einkalífi, þungun, kvíði, prófkvíði, þunglyndi, lítið sjálfstraust, vinaleysi, ofbeldi, vímuefnanotkun og fleira geta haft mjög slæm áhrif á námsgengi. Nemendur eru hvattir til að leita sér aðstoðar. Náms- og starfsráðgjafi og félagsráðgjafi vinna saman og í samstarfi við aðra fagaðila að lausn mála.

Upplýsingar

Náms- og starfsráðgjafi aðstoðar nemendur við að leita upplýsinga um nám og námsleiðir við FNV og einnig í öðrum skólum. Þetta á meðal annars við nám í öðrum framhaldsskólum og í háskólum. Eins getur námsráðgjafi aðstoðað við að afla upplýsinga um nám erlendis.

Ráðgjöf vegna vals á námi og starfi

Áhugasvið nemenda skiptir miklu varðandi náms- og starfsval. Nemendur hafa kost á því að taka áhugasviðsprófið Bendill II hjá náms- og starfsráðgjafa. Með því að taka slíkt próf er hægt að kanna skipulega ýmsa möguleika á náms- og starfsvali með hliðsjón af áhugasviði.

www.bendill.is

www.naestaskref.is

Námsvalshjól Háskóla Íslands