Fréttir

Fjölbrautaskóla Norðurlands vestra var slitið í 40. sinn við hátíðlega athöfn í íþróttahúsinu á Sauðárkróki laugardaginn 24. maí að viðstöddu fjölmenni. Í máli skólameistara, Þorkels V. Þorsteinssonar, kom m.a. fram að 2.677 nemendur hafa brautskráðst frá skólanum frá upphafi skólahalds haustið 1979. Skólameistari greindi m.a. frá því 27 húsasmiðir brautskrást í ár en það er stærsti einstaki hópur iðnmenntaðra sem brautskráðst hefur frá skólanum. Stærsti hluti þessara nemenda hefur verið í helgarnámi í húsasmíði en helgarnámið var sett á laggirnar vegna aukinnar eftirspurnar fullorðinna eftir iðnnámi en skólinn býður upp á fjölbreytt iðnnám ásamt hefðbundnum námsleiðum til stúdentsprófs. Skólameistari ræddi einnig um mikilvægi skólans í samfélaginu, með öflugum framhaldsskóla getur unga fólkið stundað nám í sinni heimabyggð eða sem næst henni en reynslan hefur sýnt að það eykur líkurnar á að unga fólkið festi hér rætur eða snúi heim aftur að loknu framhaldsnámi Íris Helma Ómarsdóttir, flutti vetrarannál skólans þar sem stiklað var á stóru í starfsemi hans. Þar kom m.a. fram að á haustönn voru 446 nemendur við skólann. Þar af 167 í hreinu fjarnámi. Nemendur á vorönn voru 488. Þá voru starfsmenn 57 á haustönn en 56 á vorönn. Að loknum vetrarannál fór fram brautskráning og afhending viðurkenninga, sem var í höndum skólameistara. Alls brautskráðust 100 nemendur af eftirtöldum námsbrautum sem hér segir, en alls voru gefin út 102 prófskírteini: Stúdentsprófsbrautir: 41 Húsasmíði- og húsgagnasmíði: 28 Meistaranám iðnbrauta:4 Hestabraut: 3 Kvikmyndabraut: 2 Rafvirkjun: 9 Sjúkraliðabraut: 4 Vélvirkjun og vélstjórn: 8 Meistaranám í húsasmíði: 4 Viðbótarnám til stúdentsprófs/Tæknistúdent: 3 Kristel Eir Eiríksdóttir flutti ávarp brautskráðra nemenda, Atli Gunnar Arnórsson flutti ávarp 20 ára brautskráningarnema og Eva Hjörtína Ólafsdóttir fluttir ávarp 30 ár brautskráningarnema. Að lokum flutti skólameistari brautskráðum nemendum heilræði fyrir lífið, óskaði þeim velfarnaðar og sagði skólanum slitið. Eftirtaldir nemendur fengu viðurkenningar: Björn Magnús Jónsson hlaut viðurkenningu fyrir framúrskarandi námsárangur sérgreinum náttúrufræðibrautar á stúdentsprófi og viðurkenningu fyrir framúrskarandi námsárangur í efnafræði á stúdentsprófi frá Efnafræðifélagi Íslands. Gunnar Ásgrímsson hlaut viðurkenningu fyrir framúrskarandi námsárangur í ensku á stúdentsprófi. Gunnar Gunnarsson hlaut og viðurkenningu fyrir framúrskarandi námsárangur í sérgreinum í húsasmíði. Hulda Björg Jónsdóttir hlaut viðurkenningu fyrir framúrskarandi námsárangur í ensku á stúdentsprófi og viðurkenningu fyrir framúrskarandi námsárangur í dönsku á stúdentsprófi. Ingunn Ingólfsdóttir hlaut viðurkenningu fyrir framúrskarandi námsárangur sérgreinum hestabrautar á stúdentsprófi. Jón Gylfi Jónsson hlaut viðurkenningu fyrir framúrskarandi námsárangur sérgreinum vélvirkjabrautar og viðurkenningu fyrir framúrskarandi námsárangur á Íslandsmóti iðn- og verkgreina. Karítas Aradóttir hlaut viðurkenningu fyrir framúrskarandi námsárangur í þýsku á stúdentsprófi og viðurkenningu fyrir framúrskarandi námsárangur í stærðfræði á stúdentsprófi. Einnig hlaut hún viðurkenningu fyrir framúrskarandi alhliða námsárangur á stúdentsprófi hagfræðibrautar. Kristel Eir Eiríksdóttir hlaut viðurkenningu og þakkir fyrir framúrskarandi störf á vettvangi félagsmála nemenda, forystu fyrir Nemendafélag FNV og alla framgöngu á vettvangi skólans. Sigurður Hannes Sigurðsson hlaut viðurkenningu fyrir framúrskarandi námsárangur i sérgreinum vélstjórnarbrautar B. Sólveig Birta Eiðsdóttir hlaut viðurkenningu frá Landlæknisembættinu fyrir framlag sitt til heilsueflandi skóla. Nemendur á sjúkraliðabraut fengu Nýja testamentið að gjöf frá Gídeonfélaginu:

Prófsýning verður haldin fimmtudaginn 23. maí kl. 09:00-10:00. Opnað verður fyrir einkunnir í INNU eftir hádegi miðvikudaginn 22. maí.

Það er létt yfir nemendum við Fjölbrautaskóla Norðurlands vestra í dag. Prófin að baki og tími til að lyfta sér upp. Væntanlegir útskriftarnemendur brugðu sér í búning í morgun. Gengu um bæinn og kvöddu kennarana sína.

Brautskráning og skólaslit verða föstudaginn 24. maí kl. 14:00 í Íþróttahúsinu á Sauðárkróki. Allir velunnarar skólans velkomnir Skólameistari

Í FNV er metnaðarfull og fjölbreytt kennsla í iðngreinum. Iðnnám er góð undirstaða undir annað nám en opnar einnig dyr fyrir fjölbreyttum atvinnumöguleikum eitt og sér. Strákar hafa verið duglegir að sækja í verknámið en stelpur eru enn í miklum minnihluta. Thelma Rán Brynjarsdóttir er þó ein fárra stelpna sem ákvað að skella sér í iðnnám. Við ákváðum að forvitnast aðeins meira um hana. Thelma Rán Brynjarsdóttir er 22 ára. Hún ólst að mestum hluta upp í Reykjavík en kom í Skagafjörðinn í sveit sem barn. Pabbi hennar og stjúpmóðir fluttu til Skagafjarðar og því tók hún 10. bekk á Hofsósi og líkaði vel. Thelma Rán er að læra vélvirkjun og tekur einnig vélstjórnarréttindi B en það gefur m.a. réttindi til að gegna stöðu vélstjóra á skipum með vélarafl allt að 1500 kw en þó stefnir hún ekki á sjóinn. Þessi menntun gefur Thelmu fjölbreytta möguleika á atvinnu, t.d. er hægt að vinna á vélaverkstæði, slipp eða sinna almennri málmsmíði. Síðasta sumar vann hún í Blönduvirkjun og ætlar þangað aftur í sumar og þá tekur hún hluta tímans sem hún þarf að vera á samning til að uppfylla kröfur til sveinsprófs. Hún segir að það sé áhugaverð vinna og gott tækifæri að fá að spreyta sig þar. Þegar Thelma valdi nám að grunnskóla loknum fannst henni mikilvægt að velja nám sem væri hagnýtt ásamt því að ljúka stúdentsprófi. Verknám nýtist vel þeim sem ætla að búa í sveit en þangað stefnir hugurinn. Thelma sér fram á að málmsmíði og vélvirkjun sé þekking sem komi henni að góðum notum í sveitastörfum framtíðarinnar. Pabbi hennar og stjúpmóðir búa í Miðhúsum í Blönduhlíð þar sem hún hefur kynnst sveitastörfum en sjálf býr hún núna í Valagerði með kærasta sínum. Í Valagerði eru hross og hún nýtur þess að nýta frítímann í að ríða út. Aðspurð út í námið segir Thelma að það sé mjög fjölbreytt, bæði verklegir tímar og bóklegt. Í verklegum tímum hafi þau til að mynda lært að búa til grill, hamar og lóð. Einnig er plötuvinnan skemmtileg og að sjóða. Í bóklegu tímunum læra þau vélstjórn, vökvafræði og ýmislegt er varðar skipsvélar. Þau hafa aðgang að hermi þar sem þau koma upp vél og starta henni, sumt af þessu getur verið flókið en þetta er skemmtilegt nám og kennararnir fínir. Verklegu tímarnir eru þeir skemmtilegustu t.d. plötuvinna og málmsuða, það er gaman að vinna með höndunum og þannig lærir maður mest. Það hafa ekki verið margar stelpur í verknáminu með Thelmu en það kemur ekki að sök því nemendahópurinn er góður og hún er tekinn inn í hópinn bæði af samnemendum og kennurum. Thelma segir að stelpur þurfa bara að gefa verknáminu séns, maður veit ekki hvað maður vill fyrr en maður prófar. Hún tekur þó fram að maður mætir ekki skólann í hælaskóm og skyrtu.

Anastasia Pistofidou frá Fab Lab Barcelona heldur erindi um Fabricademy og framtíð textíls og tækni. Erindið verður haldið þriðjudaginn 14. maí kl. 11:00-12:00 í fyrirlestrasal (kjallar) Fjölbrautaskóla Norðurlands vestra. Allir áhugasamir eru velkomnir.

Innritun í fjarnám við Fjölbrautaskóla Norðurlands vestra stendur yfir. Boðið er upp á fjarnám í fjölmörgum bóklegum áföngum við skólann, sjá nánar á http://www.fnv.is/static/files/annarskipt/afangar_i_bodi_haust_2019_fjarnam.pdf. Sérstök athygli er vakin á því að nýr hópur fer af stað í sjúkraliðanámi með fjarnámssniði á haustönn. Nánari upplýsingar á fjarnam@fnv.is og í síma 455-8000.

Boðið verður upp á nám með vinnu frá og með haustönn 2019. Um er að ræða helgarnám í rafvirkjun og bifvélavirkjun. Nemandi skal vera orðin 23 ára að aldri. Kennslufyrirkomulag: Kennt er um helgar og hefst kennsla kl. 15.00 á föstudögum og lýkur kl. 22.00 með hálftíma matarhlé um kl. 19.00. Á laugardögum hefst kennsla kl. 08:00 og lýkur kl. 18.00. Á sunnudögum hefst kennsla kl. 08.00 og lýkur kl. 17.00. Báða dagana er klukkustundar hádegishlé um kl. 12.00. Námsfyrirkomulag: Kennt er samkvæmt aðalnámskrá og tekur námið fjórar annir. Bæði verklegar og fagbókarlegar greinar eru kenndar í staðlotum. Aðrar almennar greinar s.s. íslensku, tungumál og stærðfræði þurfa nemendur að taka í hefðbundnu dagskólanámi, fjarnámi eða hjá símenntunarmiðstöðvum. Í verklegum greinum er skilyrði að nemendur mæti 100%. Sömu námskröfur eru gerðar til allra nemenda skólans og allir nemendur fara í gegn um sama námsmat. Um er að ræða sex helgar á önn. Skráningargjald er kr. 50.000 á önn Sótt er um á skrifstofu skólans og í síma 455-8000. Umsóknarfrestur er til 24. maí. Nánari upplýsingar um nám í bifvélavirkjun veitir: Geir Eyjólfsson í síma 894 5832 og á netfanginu geir@fnv.is Nánari upplýsingar um nám í rafvirkjun veitir: Garðar Páll Jónsson í síma 894 6206 eða á netfanginu gardar@fnv.is

Eftir glæsilegan framboðsfund í gær var kosin ný stjórn í Nemendafélag FNV. Kosningaþátttaka var góð og gaman var að fylgjast með líflegri kosningabaráttu. Í nýrri stjórn eru: Formaður: Rebekka Ósk Varaformaður/ritari: Anna Sóley Skemmtanastjóri: Bergljót Ásta Gjaldkeri: Þórkatla Björt Ritstjóri: Sylvía Rut Tækniformaður: Víkingur Ævar Íþróttaformaður: Hákon Ingi Ný stjórn er spennt fyrir nýju hlutverki og nemendur mega búast við góðu félagslífi næsta skólaár.

Félagslíf nemenda við FNV hefur verið öflugt í vetur. Skólinn ákvað að efla til ljósmyndasamkeppni meðal nemenda til að fanga góðu augnablikin út frá sjónarhóli nemenda. Mynd Laufeyjar Hörpu Halldórsdóttur úr söngkeppninni FNV bar sigur úr býtum. Þar sjást tilþrif Ásbjörns Waage og stemmingin á sviðinu skilar sér vel á myndinni. Laufey Harpa tekur mikið af myndum og hefur haft það að áhugamáli síðan hún var lítil. Henni finnst mjög gaman að mynda landslagið og fallegan og litríkan himinn. Laufey er dugleg að mynda viðburði á vegum nemendafélagsins og hafa margar myndir eftir hana birst í Molduxa, skólablaði nemenda, í nýjasta tölublaði og eldri blöðum. Tengill og Origo gáfu vinningshafa rausnarlega gjöf en það var Canon 4000 D myndavél, en hún er notendavæn myndavél sem er tilvalin til að fanga og deila sögum með alvöru lit og fallegum smáatriðum.